by Eiríkur on 27. febrúar 2010
Í gær eldaði ég lambalæri, kryddað með hvítlauk og rósmarín, og bar fram með ofnsteiktu rótargrænmeti. Uppskriftina er að finna í Gestgjafanum, nánar tiltekið í blaðinu þar sem er að finna bestu uppskriftir ársins 2009. Með þessu drukkum við Les Tourelles de Longueville Pauillac 2005. Þetta er “litla” vínið frá Chateau de Longueville en samt er þetta í raun ekkert lítið vín. Árið 2005 var auðvitað ákaflega gott í Bordeaux og það skiptir nánast engu máli hvaða vín maður velur – öll 2005-vín frá Bordeaux eru örugg kaup. Þetta vín keypti ég í Fríhöfninni í Keflavík og borgaði að mig minnir rúmar 4000 krónur fyrir og ég vil kalla það góð kaup. Vínið er unglegt að sjá en með góða dýpt. Í nefið fær maður fjólur, plómur, leður og vott af hesthúsi, en er ekki alveg búið að opna sig, þrátt fyrir að hafa verið umhellt klukkustund áður en það var drukkið. Í munni hefur vínið góða fyllingu, nóg af sýru og tannínum, en samt er það mjúkt og með langt og gott eftirbragð. Vínið þarf a.m.k. 1-2 ár í viðbót áður en það blómstrar út, en mun örugglega njóta sín vel næstu 7-10 árin. Einkunn: 8,5 – Góð Kaup!
Í eftirrétt gerði ég þrílitan súkkulaðibúðing. Með því drukkum við Ruppertsberger Linsenbusch Riesling Eiswein 2008. Fallegt, gullið vín með angan af apríkósum og sítrusávöxtum. Í munni sætt og þétt með góðu eftirbragði.
by Eiríkur on 31. janúar 2010
Síðastliðin vika var frekar róleg hjá okkur. Guðfinna Ósk átti afmæli í gær og vikan fór að nokkru leyti í það að undirbúa veisluna. Von var á 15 gestum og eftirvæntingin mikil. Því miður þurfti þó að aflýsa heimsókninni á síðustu stundu þar sem ælupest skaut upp kollinum. Það breytti þó ekki því að við áttum ágæta helgi að öðru leyti. Guðjón vinur okkar kom í heimsókn – fyrsta skipti sem hann kemur til Uppsala. Það var því tvöfalt tilefni til að gera sér dagamun.
Guðfinna Ósk hafði óskað eftir nautalund (blóðugri!) í mat á afmælisdaginn sinn, en við ákváðum reyndar að hafa lundina daginn áður, enda líklegt að allir yrðu nokkuð saddir eftir kökuát og því lítið pláss fyrir nautasteik. Með nautinu bauð ég upp á fondantes kartöflur, villisveppasósu og salat. Með því drukkum við Tignanello 2005 – stórfenglegt vín að öllu leyti! Fallega dökkt með mikla dýpt, ilmur af eik, leðri og sólberjum. Nokkuð tannískt með góða fyllingu og langt og gott eftirbragð. Einkunn: 9,0 – Góð Kaup! Eftir matinn fengum við okkur súkkulaði og Tommasi Amarone 2005. Mjög gott amaronevín, dökkt og fallegt í glasi, hnausþykkur ilmur af rúsínum og fjólum. Góð fylling og eftirbragð sem endist lengi. Einkunn: 8,5 – Góð Kaup!
Eins og áður sagði þurftum við að fresta afmælisveislunni þegar yngri dóttirin fékk ælupest, sem blessunarlega gekk fljótt yfir án þess að nokkur annar hafi veikst (enn sem komið er…). Við ákváðum því að fá okkur sushi (McDonalds fyrir dæturinar) og með því drukkum við Saint Clair Marlborough Riesling 2008. Það er ljósgult vín, ilmur af melónum og apríkósum, dálítið þurrt (svona mitt á milli þess að vera þurrt og hálfsætt) og passaði vel með sushinu. Einkunn: 7,0. Við opnuðum svo að lokum eina Brancaia Tre 2007 - frábært vín sem ég hef áður farið lofsamlegum orðum um hér á Vínsíðunni.
