by Eiríkur on 29. október 2009
Svo gæti maður íslenskað (?) nafnið á rauðvíninu sem ég smakkaði í fyrrakvöld – 7 Deadly Zins heitir það og er, eins og nafnið gefur til kynna, amerískur zinfandel, árgangur 2007. Það hefur hlotið ágæta dóma og Einar Brekkan benti mér á að prófa þetta vín við tækifæri.
Ég eldaði lasagna og ákvað að prófa þetta vín. Það er nokkuð dökkt eins og zinfandel á vanda til, sterkur ávaxtakeimur með brenndum eikartónum og lakkrís. Í munni hefur það nokkuð gott jafnvægi, eikar-, lakkrís og berjabragð sem dálítið tannísku eftirbragði. Einkunn: 7,0.
Í gær eldaði ég svínarif og með því drukkum við Seghesio Zinfandel 2007 og það verður að segjast eins og er að þar er öllu betra vín á ferðinni – zinfandel eins og hann gerist bestur!
Ég kom líka við í vínbúðinni Svövu og keypti mér tvær Tignanello 2006 – 93 punkta vín, enda 2006 á meðal betri árganga hjá Tignanello.
by Eiríkur on 21. október 2009
Á sunnudaginn eldaði ég pörusteik á danskan máta og var bara nokkuð ánægður með útkomuna, enda ekki á hverjum degi að maður fær slíka steik hér í Svíþjóð (þeir eru vanir að fituhreinsa kjötið aðeins of vel!). Keizarinn mætti í mat ásamt fjölskyldu sinni og ég held að hann hafi farið saddur heim.
Annars hefur verið frekar rólegt hjá mér þessa viku, lítið um rauðvínssmökkun en ég opnaði þó nýja bjórtegund í kvöld, Falcon Ekologisk Special Brew, sem er gerður úr lífrænt ræktuðu byggi. Ljós lager, ágætlega beisku en stutt eftirbragð.
Í kvöld fékk ég reyndar ábendingu um vín sem ég ætti að prófa, 7 Deadly Zins, sem eins og nafnið bendir til er amerískur Zinfandel og kostar 119 SEK. Þar sem ábendingin kemur frá nokkuð traustum aðila hugsa ég að ég skelli mér á það um helgina. Ég er reyndar að fara á disputationsveislu á föstudaginn (einn félagi minn er að ljúka doktorsprófi) og svo koma mamma, pabbi, Unnur systir og Guðmundur sonur hennar í heimsókn á laugardaginn…
