Höfundur: Eiríkur Þann 17. október 2008
Nú á nýhöfnum krepputímum þykir við hæfi að skoða hvað stendur til boða í formi kreppuvína. Líklega þarf aðeins að lækka markmiðin þegar farið er í Ríkið, enda buddan væntanlega léttari en oft áður. Að skera niður rauðvínsdrykkjuna er þó alveg út í hött, enda rauðvín í hófi gott fyrir heilsuna.
Ég á yfirleitt eitthvert kassavín uppi í skáp og það er látið duga þegar við ætlum bara að fá okkur eitt glas í miðri viku. Niðurstöður gæðarannsókna á kassavínum sem fáanleg eru í minni vínbúð benda til þess að menn ættu að vera vakandi fyrir þessum kassavínum:
- Barone Ricasoli Formulae – formúluvín frá Toscana, plómur og eik, ágætis matarvín.
- Drosdty-Hof Shiraz Pinotage – Suður-Afrískt vín með berjakeim, kryddað og örlítið reykbragð.
- Roodeberg – annað S-Afríkuvín, berja- og eikarkeimur, hæfir ágætlega með kjötkássunni.
- Infinitus – Cabernet Sauvignon og Tempranillo, dæmigerður spánverji með eikar-, kirsuberja- og kryddkeim.
- J P Chenet Cabernet Syrah – ódýr frakki með berjabragði, dugar ágætlega, samt pínu væmið.
Annars er kannski best að eiga nóg af Rosemount Shiraz, Lindemans Bin 50 Shiraz eða Casillero del Diablo Merlot í kælinum. Sunrise er samt alveg bannað, hvort sem um er að ræða Cabernet eða Merlot!
Höfundur: Eiríkur Þann 22. maí 2008
Það getur verið þrautin þyngri að velja vín fyrir brúðkaup! Ég stend nú í þessum sporum og er að leita að heppilegum vínum til að bera á borð fyrir gesti í fyrirhuguðu brúðkaupi okkar Guðrúnar nú í sumar. Ég hef velt þessu nokkuð fyrir mér enda mikilvægt að vel takist til. Það er þó margt sem þarf að huga að. Í fyrsta lagi þarf að velja vín sem ætla má að flestum muni líka við. Einnig þarf að taka tillit til pyngjunnar! Það er ekkert gefið mál að gestir okkar hafi sama smekk og við (nema kannski einhverjir meðlimir Vínklúbbsins) og því mikilvægt að vínin höfði til sem flestra. Rauðvínið þarf því að vera nokkuð aðgengilegt – ávaxtaríkt, ekki of tannískt og ekki of þungt. Þannig er líklegast að frönsku vínin séu ekki jafn líkleg til vinsælda og t.d. vín frá Chile eða Ástralíu. Concha y Toro Casillero del Diablo frá Chile er yfirleitt nokkuð traust val, hvort sem maður velur Merlot eða Cabernet Sauvignon. Sunrise kemur þó vart til greina, enda vissar grunnreglur sem þarf að fylgja! Lindemans Bin 50 Shiraz stendur alltaf fyrir sínu, Bin 45 Cabernet Sauvignon gæti einnig komið til álita en því miður er Bin 40 Merlot ekki fáanlegt í Ríkinu. Penfolds Koonunga Hill og Rawson’s Retreat koma einnig til greina, sem og Wolf Blass Eaglehawk Cabernet Sauvignon. Turning Leaf Zinfandel og Cabernet Sauvignon eru líklega einu amerísku vínin sem gætu hlotið náð fyrir augum dómnefndarinnar. Maður gæti þó kannski gerst djarfur og boðið upp á einhvern spánverja, þá einna helst Montecillo Crianza eða jafnvel Ítala, s.s. Planeta La Segreta.
Hvítvínin eru sennilega aðeins einfaldari. Montes Chardonnay, jafnvel Reserve. Peter Lehmann Barossa Riesling, Rosemount Semillon Chardonnay eða Rosemount Chardonnay er líklegust til að verða fyrir valinu.
Freyðivínið er kannski erfiðast af öllu. Auðvitað vill maður helst skála í ekta kampavíni en ég er þó á þeirri skoðun að gott freyðivín getur jafnast á við þokkalegt kampavín og ef það skilur 2500 krónur á milli þá er valið auðveldara. Wolf Blass Red Label Chardonnay Pinot Noir eða Peter Lehmann Pinot Noir Chardonnay Cuvée gætu allt eins komið í staðinn!
Erfitt val, en samt alls ekki leiðinlegt, sérstaklega ekki prófunarferlið!
