by Eiríkur on 18. desember 2009
Fyrir löngu síðan var þrúgan Gouais Blanc gerð útlæg í Frakklandi þar sem hún þótti of léleg. Þrúgan hafði náð mikilli útbreiðslu á miðöldum þar sem hún þótti tiltölulega meðfærileg. Vínin þóttu hins vegar ekki nógu góð og þrúgan því “bannlýst”. Nú hefur hún þó fengið einhverja uppreisn æru því DNA-rannsóknir hafa sýnt að þrúgan er “móðir” fínni þrúga á borð við Chardonnay, Aligoté og Gamay, sem hafa orðið til við blöndun Pinot Noir og Gouais Blanc.
Í Oxford Companion to Wine er þrúgunni lýst sem ljósri þrúgu sem gefur af sér “mjög venjuleg, súr vín”.
by Eiríkur on 12. desember 2009
Í gær var kósíkvöld hjá fjölskyldunni – góður matur og gott kvöld framundan fyrir framan imbann. Það byrjaði reyndar með því að eldri dóttirinn reyndist vera lasin og komin með 40 stiga hita. Hún var því heldur framlág en náði þó takmarkinu – að horfa á lokakvöldið í hinu sænska Idol þar sem hetjan hennar bar sigur úr býtum. Hún missti hins vegar af laxinum – pönnusteiktur, borinn fram með ofnsteiktu rótarávöxtum og kartöflum. Með laxinum drukkum við Rolling Unoaked Chardonnay 2008. Þetta er ástralskt vín sem, líkt og nafnið bendir til, hefur ekki verið sett á eikartunnur. Útkoman er nokkuð frísklegt vín með angan af ananas og sítrusávöxtum. Ágætis hvítvín sem kostar bara 72 SEK. Einkunn: 7,0 – Góð Kaup.
