Höfundur: Eiríkur Þann 10. janúar 2009
Í gær langaði okkur í góðan mat og gott vín. Við buðum því Keizaranum og fjölskyldu hans í mat – Roastbeef með þreföldum piparhjúp og timjan ásamt rösti-kartöflum og skógarsveppasósu. Algjört lostæti og með því þurfti auðvitað gott vín! Fyrir valinu varð Montes Alpha “M” 2004. Vínið er frá Colchagua í Chile og er blanda Cabernet Sauvignon (80 %), Merlot (10 %), Cabernet Franc (5%) og Petit Verdot (5 %). Mjög dökkt vín með mikla dýpt. Enn sem komið er nokkuð lokuð lykt – leður og eik, smá ávöxtur en ekki mikið meira. Í munni ákaflega mjúkt með mjög góða fyllingu, mikil tannín en samt með silkiáferð – frábært jafnvægi. Springur út í munninum með ögn af eik og dökku súkkulaði. Langt og gott eftirbragð. Frábært vín sem hægt er að njóta núna eða geyma í nokkur ár til viðbótar (spjarar sig eflaust ágætlega í 10-15 ár!).
Höfundur: Eiríkur Þann 2. janúar 2009
Carmenére var talin útdauð í Chile eftir að rótarlúsin phylloxera barst þangað um 1880. Árið 1993 fannst Carmenére þó aftur í Chile og það er enn sem komið er eina landið þar sem þrúgan er ræktuð í einhverju magni. Á síðustu árum hafa komið fram mörg vín byggð á Carmenére, sum hver ansi mögnuð. Þar á meðal er fjólublái engillinn frá Montes. Þetta er nýtt vín sem strax með fyrsta árgangi skipaði sér í hóp bestu vína Suður-Ameríku. Vínið er blanda Carmenére (92%) og Petit Verdot (8%) úr Colchagua-héraði og fær að þroskast 18 mánuði í nýjum tunnum úr franskri og amerískri eik. Alveg hreint himneskt vín!
Vín ársins 2008 á Vínsíðunni er Montes Purple Angel 2005. Það er, líkt og nafnið gefur til kynna, nánast fjólublátt á lit, mjög dökkt og þétt að sjá. Yndisleg angan af súkkulaði og kúbönskum vindlum. Í munni gríðarlega tannískt en með góða sýru á móti, kryddað, gríðarlega þétt og elegant vín með dásamlegu eftirbragði sem endist allt kvöldið. Geymist vel í 10-20 ár í kælinum!
