Höfundur: Eiríkur Þann 9. júlí 2011
Nú er ég kominn í helgarfrí og það styttist í sumarfrí – aðeins tvær vikur eftir! Helginni var fagnað í gær með grilli og tilheyrandi – grilluð svínarif með grillsósunni minni og öðru meðlæti, namm! Með þessu drukkum við Seghesio Zinfandel 2009 og það verður að segjast eins og er, að þó að vínið hafi verið firna gott þá passaði það auðvitað engan veginn með svona mat en naut sín miklu betur eftirá. Þessi árgangur er ekki alveg jafn góður og hið magnaða 2007 en engu að síður mjög gott vín – Einkunn: 8,5 – Góð Kaup!
Ég opnaði líka Dr. Loosen riesling 2010, létt og þægilegt vín eins og þýsk riesling eiga að vera, kannski aðeins of grösugt í bragði en engu að síður góð kaup (kostar aðeins um 70 SEK). Það passaði a.m.k. vel með eftirréttinum sem voru ber með vanillurjóma.
Höfundur: Eiríkur Þann 10. janúar 2010
Jæja, þá er komið að því að útnefna vín ársins 2009. Nokkuð mörg vín komu til álita að þessu sinni, flest þeirra í ódýrari kantinum, enda árið 2009 sannkallað kreppuár hjá neytendum en góðæri hjá mörgum framleiðendum sem hingað til hafa einkum framleitt vín í ódýrari kantinum.
Amalaya de Colomé 2007 kemur frá Calchaqui-dalnum í Argetínu, blanda Malbec, Cabernet Sauvignon, Syrah og Tannat. Dökkrautt og fallegt vín, áberandi plómur, lakkrís og kúrennur. Ódýrt og gott vín. Einkunn: 8,5 – Frábær kaup! (Verð 1990 ISK / 82 SEK)
Antinori Tignanello 2006 er frábær ofur-Toskani, og 2006-árgangurinn einn sá allra besti í sögu Tignanello. Dökkrautt með mikla dýpt, þéttur ilmur af sólberjum og kaffi ásamt örlitlum ávaxtakeim. Mikil og góð fylling, mikil en þó mjúk tannín og dásamlega langt eftirbragð. Einkunn: 9,0 – Góð Kaup! (Verð 6699 ISK (Fríhöfn) / 499 SEK)
Dr. Loosen Riesling QbA Mosel-Saar-Ruwer Dr. L 2008 er létt og skemmtilegt riesling-vín, hálfsætt með keim af mangó og apríkósum. Ódýrt og skemmtilegt vín. Einkunn: 8,5 – Frábær Kaup! (Verð – ISK / 79 SEK)
Bodega Catena Zapata Malbec Mendoza 2007 er pottþétt vín frá Argentínu með angan af kaffi, dökku súkkulaði og hindberjum, ásamt vott af plómum. Góð fylling og eftirbragð. Einkunn: 8,5 – Frábær Kaup! (Verð 2697 ISK / 119 SEK)
Vín ársins 2009 er hins vegar Peter Lehmann Shiraz Barossa 2006. Þetta er frábært vín með plómum, sólberjum og kirsuberjum, ásamt vott af súkkulaði og tóbaki. Góð fylling, mikil tannín til staðar en í góðu jafnvægi við sýruna. Langt og gott eftirbragð. Einkunn: 9,0 – Frábær Kaup! (Verð 2698 ISK / 119 SEK)
