by Eiríkur on 21. mars 2010
Vínklúbburinn hélt sína margrómuðu árshátíð í gær í veiðihúsinu við Grímsá í Borgarfirði. Því miður var ég (að vanda) fjarri góðu gamni og löngu kominn tími á að bóka helgarferð í marsmánuði til að geta tekið þátt í þessari mögnuðu veislu. Okkur tókst þó að fá smá nasaþef af veislunni í ár, því ég bauð Keizaranum í mat og bauð upp á sama matseðil og vínklúbburinn fékk.
Í forrétt var humar með hvítlauk, villisveppum og papriku. Frábær réttur sem vakti einróma lukku hjá öllum sem hann smökkuðu (nema Örnu!). Með humrinum drukkum við Domaines Schlumberger Gewurztraminer Les Princes Abbés Alsace 2007. Ljósleitt vín með sætri angan af perum, sítrónu og smá rósakeim. Í munni var vínið aðeins sætara en maður býst við af Gewurztraminer, góð sýra og fylling, örlítill möndlukeimur en þó ekki þessi týpiski hnetukeimur sem maður fær oft í Gewurztraminer. Frísklegt vín sem smellpassaði með humrinum og vakti mikla ánægju. Einkunn: 8,0 – Frábær Kaup! (SEK 149)
Í aðalrétt var lambakóróna með kóríanderraspi, parmakartöflum og juce, ásamt zucchini, kirsuberjatómötum og basiliku. Við höfum hingað til verið hálf-skeptísk þegar kemur að sænsku lambakjöti og haft vissa fordóma gagnvart því, en í gær fengum við frábært lambakjöt, auðvitað frá Anderson & Tillman (kjötframleiðendur í Uppsala). Kjötið var reyndar marinerað en ég hreinsaði bara marineringuna burt. Kjötið var lungnamjúkt og bragðgott, og meðlætið var líka mikið lostæti. Með kjötinu drukkum við Torres Gran Coronas Cabernet Sauvignon Reserva 2005. Fallega rautt vín með sæmilega dýpt. Í nefi áberandi eikartónar ásamt kryddum, vanillu og kirsuberjum. Í munni er vínið ágætlega tannískt en þó farið að mýkjast, gott jafnvægi, smá kakó, kirsuber og eik. Gott eftirbragð. Einkunn: 7,0 – Góð Kaup. (SEK 89 / ISK 2599)
Í eftirrétt var bláberjakaka með garðablóðbergsís, bláberjasósu og skyrmús (ég þurfti reyndar að nota tyrkneskt jógúrt í staðinn fyrir skyr, sem því miður er ekki fáanlegt hér í Uppsölum). Kakan var mjög góð, ísinn dálítið sérstakur en samt mjög góður. Mjög íslenskur eftirréttur! Passar eflaust vel með freyðivíni, en því miður hafi ég ekkert slíkt á boðstólum. Í staðinn fengum við okkur kaffi og Camus Napoleon koníak…
Frábært kvöld og ég get ímyndað mér að stemmningin á árshátíðinni hafi verið stórkostleg að vanda.
by Eiríkur on 16. janúar 2010
Árið 2007 var einstaklega gott í hinu franska Alsace, líkt og nánast allur síðasti áratugur, og árgangurinn einn sá besti í tæp 20 ár. Vínframleiðendur höfðu þó áhyggjur um vorið, því það var eitt hið heitasta og þurrasta i áraraðir. Hlýindin héldu áfram um sumarið, en með hæfilegri úrkomu svo að vaxtarskilyrði voru eins og best verður á kosið. Haustið bar einnig með sér hagstæð skilyrði og kom í veg fyrir að þrúgurnar þroskuðust of hratt eða of mikið. Botrytis cinerea (eðalmyglusveppurinn) fékk einnig hagstæðar aðstæður í lok september og niðurstaða ársins 2007 voru því mjög góð vín, hvort sem um er að ræða þurr eða sætvín.
Helstu þrúgurnar í Alsace eru Riesling, Gewürztraminer, Pinot Gris og Muscat, en Pinot Blanc, Pinot Auxerrois og Sylvaner eru einnig ræktaðar í töluverðu magni. Flest vínin eru einnar þrúgu vín (single-variety), en blöndur koma þó einnig fyrir. Þá eru einnig framleidd freyðvín sem nefnast crémant.
Í Alsace eru 51 vínekra sem flokkast undir Grand Cru og á vínum þaðan stendur “Appellation Alsace Grand Cru Contrôlée” á flöskumiðanum, ásamt nafni vínekrunnar og stundum bæjarnafninu. Önnur vín flokkast sem “Appellation Alsace Contrôlée.” Þau eru oft blöndur frá nokkrum vínekrum og bæjum og hafa stundum sérstök cuvée-heiti. Sum eru þó frá tilteknum vínekrum (þó ekki Grand Cru) og bera þá oft heiti bæjarins á flöskumiðanum.
Flest Alsace-vín eru þurr, en margir framleiðendur búa oft til sætari vín, sem þá kallast Vendange Tardive (sein uppskera eða late harvest) eða Sélection de Grains Noble (útvaldar eðalþrúgur, sætvín). Þessi vín koma yfirleitt ári á eftir þurru vínunum á markað. VT-vínin geta verið allt frá hálf-sæt til sæt, en SGN eru alltaf sæt.
Við stutta leit á heimasíðu ÁTVR sá ég að eftirfarandi Alsace-vín eru meðal annarra fáanleg í vínbúðum ÁTVR:
Trimbach Pinot Gris Reserve 2005 (89 punktar) – 2.922 krónur
Willm Gewurztraminer Reserve 2008 (84 punktar) – 2.690 krónur
Willm Riesling Reserve 2008 (87 punktar) – 2.390 krónur
Við svipaða leit í systembolaget sá ég þar fást m.a. eftirfarandi vín:
Trimbach Riesling 2007 (nr 2639) (91 punktur) - 115 SEK
Riesling Hugel 2007 (nr 12191) (87 punktar) - 129 SEK
Dopff & Irion Riesling 2007 (nr 2173) (88 punktar) - 84 SEK
Gustave Lorentz Riesling Réserve 2008 (nr 22257) (84 punktar) - 89 SEK
Gustave Lorentz Gewurztraminer Réserve 2008 (nr 5244) (87 punktar) - 89 SEK
Þá fást m.a. eftirfarandi vín á pöntunarlistanum:
Domaine Ostertag Riesling Vignobles d’E 2007 (nr 73188) (90 punktar)- 149 SEK
Schlumberger Pinot Gris Les Princes Abbés 2007 (nr 86860) (90 punktar) - 139 SEK
Að lokum fylgir hér árgangstafla Wine Spectator fyrir Alsace:
| Árgangur |
Einkunn |
Drekka/Geyma |
| 2007 |
95
|
Drekka/Geyma
|
| 2006 |
89
|
Drekka
|
| 2005 |
94
|
Drekka/Geyma
|
| 2004 |
92
|
Drekka/Geyma
|
| 2003 |
88
|
Drekka/Geyma
|
| 2002 |
92
|
Drekka/Geyma
|
| 2001 |
94
|
Drekka/Geyma
|
| 2000 |
93
|
Drekka/Geyma
|
Í aðalrétt var lambakóróna með kóríanderraspi, parmakartöflum og juce, ásamt zucchini, kirsuberjatómötum og basiliku. Við höfum hingað til verið hálf-skeptísk þegar kemur að sænsku lambakjöti og haft vissa fordóma gagnvart því, en í gær fengum við frábært lambakjöt, auðvitað frá Anderson & Tillman (kjötframleiðendur í Uppsala). Kjötið var reyndar marinerað en ég hreinsaði bara marineringuna burt. Kjötið var lungnamjúkt og bragðgott, og meðlætið var líka mikið lostæti. Með kjötinu drukkum við Torres Gran Coronas Cabernet Sauvignon Reserva 2005. Fallega rautt vín með sæmilega dýpt. Í nefi áberandi eikartónar ásamt kryddum, vanillu og kirsuberjum. Í munni er vínið ágætlega tannískt en þó farið að mýkjast, gott jafnvægi, smá kakó, kirsuber og eik. Gott eftirbragð. Einkunn: 7,0 – Góð Kaup. (SEK 89 / ISK 2599)
