by Eiríkur on 27. nóvember 2009
Eftir tæplega vikulanga fjarveru frá fjölskyldunni er efst á óskalistanum að eiga notalega kvöldstund í faðmi fjölskyldunnar. Við skruppum út í búð í dag og sáum þar hreindýrasteik sem við ákváðum að skella okkur á. Hún var kannski í dýrari kantinum en samt hverrar krónu virði, enda einstaklega góður biti sem við fengum á. Kjötið var skorið í hæfilega stórar steikur (u.þ.b. 100 g hver) og kryddað með salti, pipar og timjan. Það var síðan steikt upp úr smjöri í rúmar tvær mínútur á hvorri hlið. Í lok steikingar hellti ég smá púrtvíni (Churchill LBV 2002) út á og þannig mallaði kjötið í rúma mínútu. Sósan var gerð úr skógarsveppum, kjötsoði og bökuð upp á pönnunni eftir að kjötið hafði verið tekið af. Meðlætið var steikt grænmeti og kartöflur. Óhætt er að segja að þetta var ákaflega gott og allir borðuðu á sig gat! Þegar maður borðar slíkt lostæti er ekki hægt annað en að drekka eitthvað gott rauðvín með. Ég tók fram eina Tignanello 2006 (93 punktar í Wine Spectator)! Þetta er dökkt og fallegt vín með góða dýpt en auðvitað í það yngsta til að drekka núna. Í nefið koma fram rauð epli, lakkrís, plómur, pipar og dökkt súkkulaði. Í munni er það gríðarlega tannískt þrátt fyrir umhellinguna en hefur samt góða sýru á móti. Plómurnar koma vel fram í bragði og haldast fram í eftirbragðið sem er langt og gott. Frábært vín! Einkunn: 9,0- Góð kaup!
Púrtvínið var líka mjög gott – nokkuð sætur berjakeimur með góða fyllingu. Dæmigerður Churchill!
by Eiríkur on 2. mars 2009
Síðastliðið laugardagskvöld var “opnaðu flöskuna”-kvöldið – tilefni handa þeim sem hafa beðið eftir rétta tækifærinu til að opna flöskuna góðu sem legið hefur í kælinum, en aldrei verið opnuð þar sem tilefnið hefur látið á sér standa. Ég hef átt eina góða – Tenuta dell’Ornellaia Bolgheri Superiore Ornellaia 2002 – sem ég fékk fyrir nokkru síðan og lengi langað. Ég ákvað því að halda slíkt kvöld og bauð Keizaranum í hreindýrasteik. Hann tók með sér Rosemount Traditional 2005.
Hreindýrið var með þreföldum piparhjúp og timjan, meðlætið innbakað rótarávextir og maltsósa. Þetta tókst auðvitað frábærlega vel upp og Ornellaian smellpassaði með þessu, og Rosemountinn var líka góður. Á eftir fengum við okkur eplaköku á hvolfi og með henni drukkum við Lenz Moser Trockenbeerenauslese 2006 frá Austurríki.
Ornellaian var mögnuð – dökkt og fallegt í Riedelglösunum, mikil dýpt og kominn smá þroski í vínið. Upp úr glasinu svifu plómur, fjólur og pipar ásamt ögn af ristuðum hnetum. Gott jafnvægi, mikil fylling og langt, langt eftirbragð. Frábært vín!
Rosemount Traditional var góð – dökkt með byrjandi þroska, góð dýpt. Berjakeimur ásamt lakkrís og amerískri eik. Gott jafnvægi, talsverð tannín, gott eftirbragð. Mjög gott vín fyrir tiltölulega lítinn pening.
Lenz Moser – sætt vín frá Austurríki, gullið og fallegt í glasi. Hunang, apríkósur og smá ananas sem skilar sér meira í bragðinu sem er frísklegt og gott. Gott eftirbragð. Góð kaup.
Mjög gott kvöld með frábærum mat og frábærum vínum.
