Höfundur: Eiríkur Þann 20. nóvember 2011
Jólabjór á sér langa sögu og hefð, einkum á Norðurlöndum. Heimildir eru frá víkingatímanum að bruggaður hafi verið mjöður fyrir blótin þrjú (haust-, vor- og miðsvetrarblót) – á þessum tíma var ekki hægt að geyma mjöðinn lengi vegna þess að hann súrnaði og því var bruggað fyrir hverja hátíð. Þegar löndin svo tóku kristna trú var haldið áfram að halda veislu þegar veturinn var sem myrkastur, en nú var hátíðin tileinkuð fæðingu Frelsarans í stað þess að tileinka hana hinum heiðnu guðum. Enn í dag er bruggaður sérstakur jólabjór, sem jafnan er mun dekkri en hefðbundinn bjór.
Á Íslandi eru nú 21 tegund af jólabjór fáanlegar í vínbúðum ÁTVR, 45 tegundir í Systembolaget. Á Íslandi er enginn sænskur jólabjór fáanlegur að þessu sinni, en hér í Svíþjóð er Jólabjór frá Brugghúsinu Ölvisholti fáanlegur í fjölmörgum vínbúðum. Ég skrapp í vínbúðina mína í gær og keypti þrjár tegundir – áðurnefndan Jólabjór frá Ölvisholti, Oppigårds Winter Ale (úr Dölunum hér í Svíþjóð) og Nisse Julöl (frá Slottskällan í Uppsölum). Íslenski jólabjórinn vakti ákveðin vonbrigði – aðeins of beiskur og rammur fyrir okkar smekk. Nisse og Winter Ale eru hins vegar nokkuð góðir og erfitt að gera upp á milli þeirra.
Ég er á leiðinni til Falun í kvöld og næ kannski að prófa eina eða tvær tegundir til viðbótar þarna uppfrá.
Höfundur: Eiríkur Þann 25. nóvember 2009
Beaujolais Nouveau kom í hillurnar í síðustu viku. Ástæða þess að ég hef ekkert fjallað um það fyrr en nú er einfaldlega sú að ég er alveg búinn að missa áhugann á þessu sulli. Einu sinni var þetta spennandi og hypað á allan mögulegan hátt en mesti áhuginn hefur dvínað undanfarin ár. Beaujolais hefur svo sem ekki verið þekkt fyrir að framleiða nein stórkostleg vín, en Beaujolais villages-vín eru samt þokkaleg og Cru de Beaujolais geta verið nokkuð góð. Nouveau er hins vegar oft eins og áfengt hindberjasaft…
Það sem mér hefur þótt meira spennandi við þennan árstíma er að nú er jólabjórinn kominn í hillurnar. Ég hef almennt verið hrifnari af ljósum bjór en fæ mér stundum dökkan. Jólabjór er hins vegar nær undantekningarlaust dökkur og með góðu maltbragði – stundum nánast eins og maður sé að drekka Egils Malt nema að það er þá um 6% að styrkleika.
Í vínbúðum ÁTVR eru núna fáanlegar 11 ólíkar tegundir jólabjórs, þar af 2 erlendar. Ég hef aðeins náð að smakka eina tegundina, hinn sænska Arboga Julebrygd. Arboga er venjulega einn af mínum uppáhaldsbjórum en ég varð fyrir pínulitlum vonbrigðum með jólabjórinn. Ekki það að hann sé neitt vondur – ég var bara að vonast eftir aðeins betri bjór! Hann hefur auðvitað nokkuð sterkt maltbragð og sæmilega beiskju, smá rúgbrauðskeimur en það vantar eiginlega lokahnykkinn á að þetta sé frábær bjór.
Mariestads Export er líka einn af mínum uppáhaldsbjórum en Mariestads Julebrygd olli mér vonbrigðum, og ég held að Keizarinn hafi verið svolítið vonsvikinn líka. Bjórinn er mjög beiskur, þokkalegt maltbragð en beiskjan er eiginlega of yfirgnæfandi fyrir minn smekk.
Slottskällan er brugghúsið okkar í Uppsala og þeir eru með tvo jólabjóra í ár – Tomte julöl og Nisse julöl. Tomte er örlítið beiskur, með áberandi humla ásamt vott af appelsínuberki og súkkulaði – góður jólabjór! Nisse ætla ég að smakka í kvöld…
