Höfundur: Eiríkur Þann 29. mars 2010
Tengdó eru í heimsókn hjá okkur um þessar mundir og við gripum tækifærið að hafa barnapössun!
Um helgina brugðum við undir okkur betri fætinum og skruppum til Stokkhólms að hitta Hugrúnu og Hermann sem voru þar stödd í helgarferð. Við röltum um gamla bæinn og brugðum okkur inn á veitingahúsið Mårten Trotzig þar sem við snæddum mjög góðan hádegisverð – lambakjöt, entrecote og villibráðarkjötbollur. Með þessu drukkum við flösku af Becquer Rioja 2005, prýðisgott rauðvín með mjúkum eikar- og pipartónum.
Um kvöldið ætluðum við að fá okkur eitt glas á Prime Winebar en þar var allt uppbókað svo að ekkert varð af þeirri heimsókn. Við héldum því á Sturehof, veitingahús við hið margfræga Stureplan, sem mér skilst að sé miðpunkturinn í skemmtanalífi Stokkhólms (ef svo er eiga þeir ýmislegt ólært af miðbæ Reykjavíkur!). Sturehof er frekar trendý veitingastaður sem leggur áherslu á fisk og skelfisk, en er einnig með fínan vínlista. Vínið sem mælt var með þetta kvöld var Joseph Phelps Cabernet Sauvignon 2005, hvorki meira né minna, og fyrir ekki meiri pening en 750 SEK per flösku. Það leiddi nánast til þess að maturinn var valinn út frá víninu! Í forrétt fékk ég mér andalifrarterrine en hin fengu sér hörpuskel. Forrétturinn var mjög góður og gaf fögur fyrirheit um það sem koma skyldi. Aðalrétturinn var unglamb með var borin fram með m.a. einhvers konar lambapylsu og kartöflum. Lambið og pylsan voru hins vegar brimsölt! Við höfðum orð á því við þjóninn og það var eins og við manninn mælt – hann lét varla sjá sig það sem eftir lifði kvöldins! Hann reyndi undir lokin að selja okkur eftirrétt en okkur fannst vera nóg komið og héldum okkar leið. Rauðvínið var hins vegar firnagott!!! Við fengum okkur Creme Brulé á nálægri krá og héldum síðan á rölt um bæinn að prófa bjór og annað gott…
Niðurstaðan af þessu rölti okkar var sú að ég get eindregið mælt með veitingastaðnum Mårten Trotzig, en það verður bið á því að ég fari aftur á Sturehof.
Höfundur: Eiríkur Þann 23. júní 2009
Í nýafstaðinni Íslandsheimsókn okkar vorum við boðin í mat til Hugrúnar og Hermanns. Þau búa á Álftanesinu í námunda við húsbrjótinn alræmda (réttara sagt, hann bjó þarna nálægt).
Það er alltaf gaman að koma heim til Hugrúnar og Hemma. Þau töfra alltaf fram dásamlega rétti og Hemmi kann sko að velja vín við hæfi! Að þessu sinni grillaði hann bleikju að hætti Rikku (hann útskýrði fyrir mér hver það væri en það skolaðist eitthvað til hjá mér þegar leið á kvöldið – væri gott að fá komment á það hver þessi Rikka er!). Bleikjan var marineruð í m.a. soja, kóríander, sítrónugrasi, hvítlauk og fleiru, grilluð í álumslagi og bragðbætt með sesamfræjum. Útkoman hreint út sagt stórkostleg! Með þessu drukkum við Planeta Chardonnay (man ekki hvaða árgang) – frábært hvítvín frá Sikiley. Það er óvenjudökkt af chardonnay að vera, liturinn og lyktin minnti nánast á sætvín – hunang, apríkósur og eik. Bragðið þétt og jafnvægið mjög gott, langt og gott eftirbragð. Eftir á að hyggja get ég varla hugsað mér betra vín með bleikjunni.
Fyrir matinn hafði Hemmi dregið fram Penfolds Grange 1993. Þar er sko ekkert smávægilegt vín á ferðinni – flaggskip Penfolds og stolt ástralskrar vínframleiðslu! Vínið var mjög dökkt í glasinu með mikla dýpt – ákaflega falleg sjón. Þegar við lyktuðum af víninu fórum við í sæluvímu – sólberjahlaup, pipar, leður, súkkulaði…, listinn gæti verið nánast óendanlegur en ég verð samt að minnast á að við töldum okkur finna lykt af hreindýrablóði! Þetta er í fyrsta sinn sem ég tek eftir þessu í víni og almennt séð myndi ég ekki segja að lykt af hreindýrablóð væri neitt sérstaklega góð en í réttu samhengi er hún kynngimögnuð og seiðandi. Stórkostlegt vín og nánast hægt að segja að við höfum fengið lyktarfullnægingu (ef slíkt er nú til)! Þegar í munninn var komið var upplifunin ekkert síðri. Geysilega þétt vín, tannínin orðin mjúk en áttu samt eitthvað eftir. Vínið var í fullkomnu jafnvægi, bragðið hrein unun og eftirbragðið nánast óendanlegt. Vín sem á mörg ár, ef ekki áratugi eftir!
Á eftir opnuðum við Joseph Phelps Cabernet Sauvignon 1996. Þetta er þéttur bolti frá Napa Valley, alvöru bolti en leið töluvert fyrir það að vera drukkið á eftir Grange, enda flest vín hálf lítilfjörleg í samanburði við það. Vínið var þó einnig fallega dökkt með góða dýpt, kominn góður þroski. Í nefinu fundum við lykt af gráðaosti, eik og leðri, pipar og kryddi. Vínið var í góðu jafnvægi, tannínin mjúk og góð, fyllingin góð og eftirbragðið mjög þétt og langt. Frábært vín en leið eins og áður sagði fyrir það að koma á eftir Grange.
Stórkostlegt kvöld eins og alltaf hjá Hugrúnu og Hemma – takk fyrir okkur! Við Hemmi ákváðum líka að halda vínklúbbsfund í næstu Íslandsheimsókn okkar í byrjun september og ég er þegar farinn að hlakka til.
