by Eiríkur on 12. desember 2009
Í gær var kósíkvöld hjá fjölskyldunni – góður matur og gott kvöld framundan fyrir framan imbann. Það byrjaði reyndar með því að eldri dóttirinn reyndist vera lasin og komin með 40 stiga hita. Hún var því heldur framlág en náði þó takmarkinu – að horfa á lokakvöldið í hinu sænska Idol þar sem hetjan hennar bar sigur úr býtum. Hún missti hins vegar af laxinum – pönnusteiktur, borinn fram með ofnsteiktu rótarávöxtum og kartöflum. Með laxinum drukkum við Rolling Unoaked Chardonnay 2008. Þetta er ástralskt vín sem, líkt og nafnið bendir til, hefur ekki verið sett á eikartunnur. Útkoman er nokkuð frísklegt vín með angan af ananas og sítrusávöxtum. Ágætis hvítvín sem kostar bara 72 SEK. Einkunn: 7,0 – Góð Kaup.
by Eiríkur on 14. nóvember 2009
Í gær vorum við boðin í afríkanskan laxapottrétt hjá Keizaranum. Ég kippti með einni De Bortoli Shiraz 2008 sem ég hafði keypt í gær, ekki vegna þess að ég taldi hana passa svo vel við laxinn (út frá því sjónarmiði hefði verið betra að taka með góða Chardonnay) heldur einfaldlega af því að mig langaði til að smakka hana! Þetta er auðvitað mjög ungt vín að sjá, ekki mikil dýpt en kannski ekki við því að búast heldur. Í nefinu einkum pipar og skógarber sem skila sér í munninn. Sýran aðeins of mikil, ekki of mikil tannín, sæmileg fylling og þokkalegt eftirbragð. Í heildina sér þokkalegasta hversdagsvín – Einkunn: 7,0 – Góð Kaup! Flaskan kostaði ekki nema 69 SEK og maður fær því nokkuð mikið fyrir peninginn (fékk 86 punkta hjá Wine Spectator).
