Höfundur: Eiríkur Þann 26. júní 2010
Þessa dagana er ég staddur í fríi á Íslandi ásamt dætrum mínum og Guðrún er væntanleg í vikulokin. Við fórum í dag og kíktum á gamlar drossíur, en Fornbílaklúbbur Íslands er með landsmót á Selfossi (þar sem foreldrar mínir búa). Þar sáum við bæði glæsivagna og gamla skrjóða í misgóðu ástandi.
Pabbi grillaði gómsæta nautasteik og með henni drukkum við Les Tourelles des Longueville Pauillac 2005. Ákaflega gott vín, unglegt með frísklega berjakeim þar sem einnig má finna angan af eik, leðri og tóbaki. Rífandi tannín og sýra í góðu jafnvægi gefa góð fyrirheit um framtíðina, en þetta vín á nokkuð í land með að ná fullum þroska og væri best að geyma í a.m.k. 3-4 ár til viðbótar. Engu að síður ljúffengt nú þegar – Einkunn: 9,0 – Góð Kaup!
Höfundur: Eiríkur Þann 27. febrúar 2010
Í gær eldaði ég lambalæri, kryddað með hvítlauk og rósmarín, og bar fram með ofnsteiktu rótargrænmeti. Uppskriftina er að finna í Gestgjafanum, nánar tiltekið í blaðinu þar sem er að finna bestu uppskriftir ársins 2009. Með þessu drukkum við Les Tourelles de Longueville Pauillac 2005. Þetta er “litla” vínið frá Chateau de Longueville en samt er þetta í raun ekkert lítið vín. Árið 2005 var auðvitað ákaflega gott í Bordeaux og það skiptir nánast engu máli hvaða vín maður velur – öll 2005-vín frá Bordeaux eru örugg kaup. Þetta vín keypti ég í Fríhöfninni í Keflavík og borgaði að mig minnir rúmar 4000 krónur fyrir og ég vil kalla það góð kaup. Vínið er unglegt að sjá en með góða dýpt. Í nefið fær maður fjólur, plómur, leður og vott af hesthúsi, en er ekki alveg búið að opna sig, þrátt fyrir að hafa verið umhellt klukkustund áður en það var drukkið. Í munni hefur vínið góða fyllingu, nóg af sýru og tannínum, en samt er það mjúkt og með langt og gott eftirbragð. Vínið þarf a.m.k. 1-2 ár í viðbót áður en það blómstrar út, en mun örugglega njóta sín vel næstu 7-10 árin. Einkunn: 8,5 – Góð Kaup!
Í eftirrétt gerði ég þrílitan súkkulaðibúðing. Með því drukkum við Ruppertsberger Linsenbusch Riesling Eiswein 2008. Fallegt, gullið vín með angan af apríkósum og sítrusávöxtum. Í munni sætt og þétt með góðu eftirbragði.
