Höfundur: Eiríkur Þann 27. ágúst 2011
Við höfum smá matarboð um síðustu helgi og buðum m.a. Gísla og Jóhönnu. Þau færðu okkur flösku af Penfolds Koonunga Hill Shiraz Cabernet 2010 og ég varð nokkuð ánægður að sjá þá flösku, því það er orðið ansi langt síðan ég prófaði þetta vín. Í kvöld grillaði ég svo nautakjöt á spjóti og fannst tilvalið að opna þessa flösku með. Vínið er að vanda dökkt og fallegt í glasi, unglegt en með smá dýpt. Í nefið koma fjólur, súkkulaði og lakkrís, smá pipar ásamt eikarkeim. Vínið er vel tannískt, sýran aðeins yfir meðallagi, góð fylling og eftirbragðið heldur sér þokkalega. Ágætis vín sem hentaði vel með grillinu. Einkunn: 7,5 – Góð Kaup!
Höfundur: Eiríkur Þann 16. september 2009
Ég rölti inn í eina vínbúð í dag, ekki mína venjulega heldur búðina í miðbænum. Sú búð fær oft fleiri nýjungar en vínbúðin mín, og mig langaði að sjá hvort það væri eitthvað athyglisvert á boðstólum. Ég rakst þar á nokkur eintök af Tignanello 2006 á 499 SEK (rúmar 8.900 ISK). Ég var að velta fyrir mér að skella mér á eina eða tvær flöskur en ákvað svo að bíða aðeins. Ég er nefnilega á leiðinni til Berlínar á sunnudaginn og kannski rekst ég á eitthvað gott í þeirri ferð. Síðast þegar ég fór um terminal 2 á Arlanda sá ég m.a. Penfolds Bin 707 á rúmar 800 SEK og sá lengi eftir því að hafa ekki tekið eina flösku. Svo spillir ekki fyrir að helsta verslunarmiðstöð Berlínar er beint fyrir utan hótelið mitt og kannski er eitthvað áhugavert að finna þar. Ef ég sé ekkert spennandi í ferðinni þá skelli ég mér líklega á 1-2 eintök af Tignanello…
