Höfundur: Eiríkur Þann 22. nóvember 2010
Í gær ætluðum við að eiga notalega kvöldstund og borða góðan en einfaldan mat. Við ætluðum fyrst að gera lasagna en svo fann ég uppskrift að rétti sem heitir Anelletti al Forno, sem líkt og lasagna er ofnbakaður pastaréttur. Rétturinn var einfaldur og tiltölulega fljótlegur í matreiðslu (eldunartíminn um 1½ klst). Niðurstaðan var mjög góður réttur sem börnin skófluðu í sig af bestu lyst! Með þessu drukkum við Brancaia TRE 2008 sem eftir duglega umhellingu hafði gott berjabragð með ágætis fyllingu og eftirbragði – smellpassaði með matnum.
Höfundur: Eiríkur Þann 14. nóvember 2010
Á föstudaginn langaði okkur í góðan mat og gott vín, m.a. til að fagna því að Guðrún og sonurinn væru komin heim. Ég fór í sund með dæturnar og maturinn varð því að vera einfaldur, hægt að útbúa fyrirfram eða hvoru tveggja. Við gerðum því Beef Wellington með nautahakki í stað nautalundar, nokkurs konar Wellington fátæka mannsins (uppskriftina er að finna í einni af bókum Jamie Oliver og satt að segja höfðum við horft á þessa uppskrift í nokkurn tíma og langað til að prófa). Við vildum líka drekka gott rauðvín og ég tók út eina Barone Ricasoli Castello di Brolio Chianti Classico 2006 sem ég fékk nýlega í hús. Þetta vín lenti í 5. sæti á topp-100 lista Wine Spectator í fyrra og ég skil það vel! Vínið er enn ungt og var mjög lokað þegar því var hellt beint úr flösku í glas og ég ákvað því að umhella því rösklega og prófa á ný. Dásamlegur sólberja- og blómailmur með vott af lakkrís sem kemur betur fram í munni ásamt berjabragði. Fín tannín og dásamlegt eftirbragð sem heldur sér nokkuð lengi. Frábært Chianti Classco. Einkunn: 9,5 – Frábær Kaup!
PS. Wellington-steikin var bara skrambi góð með villisveppasósu og kartöflum!
