Höfundur: Eiríkur Þann 19. ágúst 2010
Já, loksins komumst við í Liseberg! Dæturnar völdu nefnilega Liseberg sem sumarleyfisstaðinn í ár og tóku hann fram yfir sólarlandaferð eða annað þvíumlíkt. Við fórum reyndar til Íslands í 3 vikur en það er víst ekki hægt að kalla það sólarlandaferð þrátt fyrir að veðrið hafi verið með ágætum. Við ætluðum svo að fara í tjaldferðalag til Gautaborgar eftir heimkomuna frá Íslandi en urðum þá fyrir því að bíllinn bilaði og við komumst því hvorki lönd né strönd. Við skruppum reyndar í Gröna Lund en það fannst þeim ekki alveg sambærilegt (mig grunar reyndar helst að það hafi verið tjaldferðalagið sem var málið og Liseberg bara bónus!). Skólarnir eru svo að byrja í þessari viku (byrjuðu í gær) og úr því að við vorum í fríi þessa viku ákváðum við að slá tvær flugur í einu höggi og skreppa til Liseberg ásamt því að heimsækja vini okkar í Osló.
Eftir að hafa prófað bæði Gröna Lund og Liseberg erum við öll sammála um það að Liseberg ber höfuð og herðar yfir Gröna Lund!
Ferðin tókst mjög vel og við skemmtum okkur vel í góðra vina hóp. Ég tók með mér sitt hvora flöskuna af vínunum sem ég pantaði um daginn – William Fevré Chablis 2008 og Lammershoek Red Roulette 2006. Rauðvínið drukkum við með entrecote sem var grilluð á sunnudagskvöldið. Þetta er alveg einstaklega gott vín, ávaxtaríkt með kirsuberjum, plómum og leðri mest áberandi í seiðandi angan. Góð fylling í munni, mjúk tannín og hæfileg sýra. Langt og gott eftirbragð. Einkunn: 9,0 – Bestu Meðmæli. Hvítvínið drukkum við svo á mánudeginum með sushi og það var einnig “match made in heaven”-dæmi, góður sítrusilmur með ögn af eik, perum og smjöri, frísklegt í munni með mjúkum eikartónum. Sítrusinn áberandi í eftirbragðinu. Einkunn: 9,0 – Bestu Meðmæli.
Réttast væri að panta meira hið fyrsta…
Höfundur: Eiríkur Þann 3. ágúst 2010
Það hefur verið hálfgerð gúrkutíð hjá mér að undanförnu og lítið um vínprófanir frá því að engillinn góði var tekinn upp. Ég var að vinna í Falun alla síðustu viku þar sem ég smakkaði reyndar eitt gott rauðvín. Ég fékk mér glas af Gnarly Head Zinfandel 2008 og það var bara skrambi gott. Gott berjabragð með smá súkkulaði og pipar, vottur af amerískri eik. Ágætis kaup – kostar 90 SEK í systeminu og tæpar 2000 krónur í ÁTVR.
Ég var svo á vakt alla helgina og svo sem nóg að gera þar. Svo átti hún Guðrún mín afmæli á sunnudaginn og eftir að hafa horft á Julie & Julia á laugardagskvöldið langaði okkur mikið í mat að hætti Julia Child og ákváðum að elda Boeuf Bourgignonne á sunnudeginum. Við komumst fljótt að því að þetta er svona réttur að það tekur eiginlega tvo daga að elda hann ef vel á að vera, þar sem kjötið er græjað daginn áður. Uppskriftin sem við notuðum var fengin frá Thomas Keller sem rekur The French Laundry í Kaliforníu, en sá staður þykir einn sá flottasti þar í landi. Uppskriftin var í sjálfu sér ekki flókin en mikil vinna í henni, kannski aðeins of mikil! Rétturinn tókst hins vegar mjög vel og við vorum ánægð með útkomuna (ákváðum reyndar smá breytingar ef við gerum þetta aftur!). Svo gerði ég franska súkkulaðiostaköku í eftirrétt og það var engin smá kaka, þó hún væri í raun sáraeinföld – alveg gríðarlega creamy og ljúffeng.
Ég hef svo aðeins verið að fletta í nýjasta Wine Spectator, sem að þessu sinni fjallar um veitingastaði fyrir vínáhugafólk. Að þessu sinni er enginn íslenskur staður með á listanum, en það er svo sem vel skiljanlegt á þessum síðustu og verstu tímum, því það kostar bæði tíma og peninga að komast á listann (veitingahúsin borga fyrir að vera með, og listinn er ekki alveg skotheldur, því eins og frægt er orðið komst einn staður inn á listann fyrir tveimur árum, en sá staður var í raun aðeins hugarburður blaðamanns eins og ekki til í alvörunni). Mér finnst reyndar skemmtilegast að renna yfir listann aftast í blaðinu þar sem allir víndómarnir eru. Ég reyni alltaf að sjá hvort það séu einhver áhugaverð vín sem eru fáanleg á Íslandi og/eða í Svíþjóð. Að þessu sinni fann ég ekkert spennandi sem er fáanlegt á Íslandi en í Svíþjóð fann ég 3 vín og pantaði 2 tegundir áðan: William Févre Chablis Domaine 2008 (á 169 SEK – pöntunarnúmer 87642, og Lammershoek Roulette Rouge 2006 á 137 SEK – pöntunarnúmer 83586). Ég fæ þetta líklega í næstu viku og get þá greint nánar frá þeim…
