Höfundur: Eiríkur Þann 18. október 2009
Já, það er skömm frá að segja en ég hreinlega gleymdi að panta mér Bordeaux 2006 í síðustu viku! Valið stóð helst á milli Talbot, Léoville-Barton og Chasse-Spleen en nú verð ég að bíða fram í lok næstu viku til að sjá hvort það sé eitthvað eftir handa mér. Ég var reyndar orðinn pínu þreytt, enda búinn að vera á næturvöktum alla vikuna og var einmitt á leið í vinnuna þegar ég mundi eftir þessu, en svona er þetta nú bara. Sem betur fer var þetta ekki annar 2005-árgangur – þá hefði maður jafnvel tekið frí frá vinnu til að ganga frá pöntuninni.
Ég fór þó í ríkið á föstudaginn og keypti mér Chateau Mont-Redon Chateauneuf-du-Pape 2005. Þetta var ágætisvín, kannski örlítið daufara en ég hafði gert mér vonir um. Líkt og mörg önnur Rónarvín er það að mestu leyti gert úr Grenache (65%), Syrah (15%) og Cinsault (10%), en nokkrar aðrar þrúgur hafa líka slæðst með. Það hefur dálítið blautan eikarkeim, ber og lakkrís í annars dálítið fátæklegri lykt. Í munni nokkuð gott jafnvægi þar sem áðurnefnd lyktar- og bragðelement koma ágætlega fram ásamt smávegis pipar. Sæmilegt eftirbragð. Einkunn: 6,5 – pínulítil vonbrigði með þetta vín þar sem ég borgaði 234 SEK fyrir það.
Ég keypti líka Ný-Sjálenskt rauðvín sem heitir Wild Rock Gravel Pit Red 2008, blanda Merlot og Malbec, og ég held örugglega að þetta sé í fyrsta sinn sem ég smakka slíka blöndu. Þetta er unglegt vín að sjá, ilmur af eik, plómum, myntu og súkkulaði sem skila sér í bragðinu, sem er nokkuð tannískt og skortir aðeins upp á sýru til að vega upp á móti tannínunum. Ágætis hversdagsvín og mun betri kaup en frakkinn sem ég fjallaði um hér að ofan. Einkunn: 6,5 – kostar 99 SEK.
Höfundur: Eiríkur Þann 8. september 2007
Það hefur verið fátt um fína drætti í mínum vínkaupum að undanförnu. Guðrún kom reyndar heim með Torres Mas La Plana og Penfolds Bin 407 í gær, sá síðarnefndi kærkominn gamall vínur sem ekki er fáanlegur hér í sænska systeminu. Mig dauðlangar þó að fara að panta mér eitthvað skemmtilegt og hef því verið í rýna í tímaritin og fylgjast með spjallinu á netinu. Eftir því sem ég kemst næst þá eru bestu kaupin núna í Beaujolais, Pinot Noir (hvaðanæva að úr heiminum) og síðast en ekki síst í Rhone. Hér er í öllum tilvikum átt við 2005-árganginn, en í Rhone þykir hann einn sá besti í manna minnum (þarf a.m.k. að fara aftur til 1978 og 1961 til að finna sambærilega árganga). Chablis og Bordeaux eru jú líka mjög góðir, og …
Almennt má segja að 2005 sé feikna gott ár og óhætt að kaupa flest sem tilheyrir þeim árgangi.
Nokkrar ábendingar um góð kaup í vínbúðum ÁTVR:
Marques de Riscal Rioja Riserva 2002 (1.690 kr) – 5 stjörnur og Best Value í Decanter
Campo Viejo Rioja Riserva 2002 (1.290 kr) – 3 stjörnur í Decanter
Philip Shaw No 11 Chardonnay 2005 (2.990 kr)
Montes Alpha Syrah 2005 (1.590 kr) – 92 stig í Wine Spectator
Beringer Cabernet Sauvignon Private Reserve – (3.800 – ef þetta er rétt verð þá er það hreint og beint hlægilegt og bendir frekar til einhverra mistaka hjá ÁTVR, því fyrir nokkrum árum kostaði þetta vín tæplega 10.000 – fyrir þá sem fengu!)
Ef einhver í Svíþjóð les þetta þá bendi ég á:
Goats do Roam in Villages 2004 (88782 – 99 SEK, þarf að sérpanta)
Montes Alpha Syrah 2005 (86787 – 159 SEK, þarf að sérpanta)
Louis Jadot Beaujolais-Villages 2005 (83873 – 99 SEK, þarf að sérpanta)
Château Batailley 2001 (97889 – 299 SEK, nýjung í september, tímabundið í sölu)
Góða helgi!
