Höfundur: Eiríkur Þann 31. janúar 2010
Síðastliðin vika var frekar róleg hjá okkur. Guðfinna Ósk átti afmæli í gær og vikan fór að nokkru leyti í það að undirbúa veisluna. Von var á 15 gestum og eftirvæntingin mikil. Því miður þurfti þó að aflýsa heimsókninni á síðustu stundu þar sem ælupest skaut upp kollinum. Það breytti þó ekki því að við áttum ágæta helgi að öðru leyti. Guðjón vinur okkar kom í heimsókn – fyrsta skipti sem hann kemur til Uppsala. Það var því tvöfalt tilefni til að gera sér dagamun.
Guðfinna Ósk hafði óskað eftir nautalund (blóðugri!) í mat á afmælisdaginn sinn, en við ákváðum reyndar að hafa lundina daginn áður, enda líklegt að allir yrðu nokkuð saddir eftir kökuát og því lítið pláss fyrir nautasteik. Með nautinu bauð ég upp á fondantes kartöflur, villisveppasósu og salat. Með því drukkum við Tignanello 2005 – stórfenglegt vín að öllu leyti! Fallega dökkt með mikla dýpt, ilmur af eik, leðri og sólberjum. Nokkuð tannískt með góða fyllingu og langt og gott eftirbragð. Einkunn: 9,0 – Góð Kaup! Eftir matinn fengum við okkur súkkulaði og Tommasi Amarone 2005. Mjög gott amaronevín, dökkt og fallegt í glasi, hnausþykkur ilmur af rúsínum og fjólum. Góð fylling og eftirbragð sem endist lengi. Einkunn: 8,5 – Góð Kaup!
Eins og áður sagði þurftum við að fresta afmælisveislunni þegar yngri dóttirin fékk ælupest, sem blessunarlega gekk fljótt yfir án þess að nokkur annar hafi veikst (enn sem komið er…). Við ákváðum því að fá okkur sushi (McDonalds fyrir dæturinar) og með því drukkum við Saint Clair Marlborough Riesling 2008. Það er ljósgult vín, ilmur af melónum og apríkósum, dálítið þurrt (svona mitt á milli þess að vera þurrt og hálfsætt) og passaði vel með sushinu. Einkunn: 7,0. Við opnuðum svo að lokum eina Brancaia Tre 2007 - frábært vín sem ég hef áður farið lofsamlegum orðum um hér á Vínsíðunni.
Höfundur: Eiríkur Þann 27. október 2007
Vínþjónasamtökin héldu uppskeruhátíð á Hilton Reykjavík Nordica um síðustu helgi og við það tækifæri voru ýmis verðlaun veitt.
Hvatningarverðlaun Vínjónasamtakanna voru veitt í fyrsta sinn og þau hlaut Fríhöfnin á Keflavíkurflugvelli fyrir að stuðla markvísst og ákveðið að aukinni vínmenningu á landinu.
Á Uppskeruhátíðinni var einnig tilkynnt um vínin sem fengu í ár Gyllta Glasið eftirsótta – 5 hvítvín og 5 rauðvín af 45 sem kepptu. Vínin áttu að vera frá Evrópu og í verðflokki á milli 1490 kr og 2490 kr. Þetta er þriðja árið sem Vínþjónasamtökin veita viðurkenninguna um “Gyllta Glasið” og tilgangur með því er að vekja athygli á 10 vínum sem standa uppúr, 5 hvít og 5 rauð – án þess að flokka þau nánar innbyrðis. Fjörtíu og fimm vín skiluðu sér í keppnina. Vínþjónasamtökin svo og fulltrúar þeirra birgja sem óskuðu þess mynduðu dómnefndina þar sem 15 manns sátu og smökkuðu blint. Eins og fyrr var mjótt á munum og í sumum tilfellum munaði bara einu stigi á milli vína. Spænsk vín voru áberandi núna – en eitt var enn meira áberandi: dómararnir voru að mjög miklu leyti sammála um gæði vínanna. Parker skalinn svokallaði (frá 50 í 100) var notaður, og meðaleinkunn hjá flestum var á bilinu 83 til 85, og allir nema 2 fóru yfir 90 stig. Einkunnir og meðaleinkunnir verða ekki opinberaðar þar sem öll þessi vín eru jöfn meðal jafningja í 5 efstu sæti.
Eftirfarandi vín fá Gyllta Glasið árið 2007:
Hvítvín:
Brundlmayer Gruner Veltliner 06 frá Austurríki (umboðsmaður : RJC)
Dopff Moulin Pinot Gris 05 frá Alsace, Frakklandi (Umboðsmaður : Mekka)
Drouhin Pouilly Fuissé 06 frá Bourgogne, Frakklandi (umboðsmaður : Bakkus)
Francois d’Allaines Saint Romain 04 frá Bourgogne, Frakklandi (umboðsmaður : Vínekran)
Lalande Pouilly Fuissé 04, frá Bourgogne, Frakklandi (umboðsmaður : Perlukaup)
Rauðvín:
Baron Ley Finca Monasterio 04, frá Rioja, Spáni ( Umboðsmaður : Glóbus)
Baron de ley Reserva 01 frá Rioja, Spáni (Umboðsmaður : Glóbus)
Château Barbe Blanche 04, frá Bordeaux (Lussac St Emilion), Frakklandi (Umboðsmaður : RJC)
Marquese Antinori Chianti Classico 03, frá Ítalíu (Umboðsmaður : Glóbus)
Tomassi Ripasso 04, frá Valpolicella, Ítalíu (Mekka) sem vel að merkja fær Gyllta Glasið annað árið í röð.
