Höfundur: Eiríkur Þann 2. júní 2011
Vínklúbburinn Reinhardt hélt fyrstu árshátíð sína um síðustu helgi. Þemað var ítalskt – bæði matur og vín. Í forrétt gerðum við Carpaccio og með því drukkum við Stefano Antonucci Verdicchio Classico Riserva 2007. Það var nokkuð sérstakt vín og í fyrsta sinn (að ég held) sem við prófuðum vín úr þessari þrúgu. Vínið er gyllt á lit, góð dýpt. Dálítið sætur keimur af hnetum, vanillu, sítrónum, ferskjum og smá eik. Góð fylling í bragðinu, þar sem hnetukeimurinn kemur betur fram. Gott eftirbragð sem heldur sér vel. Einkunn: 8,0 – Góð Kaup.
Í aðalrétt bárum við fram grillaða kálfaentercote með gratíneruðum aspas, rjómalagaðri kartöflumús og klettasalati. Kálfakjötið þótti takast afar vel upp og vakti mikla lukku. Með því drukkum við Fontanafredda Barolo Serralunga d’Alba 2007. Vínið var dökkt og fallegt að sjá, í nefinu eik, lakkrís, kakó, kirsuber og smá tóbak. Dálítið tannískt, gott jafnvægi, langt og gott eftirbragð. Mjög gott vín sem óhætt er að mæla með. Einkunn: 8,5 – Góð kaup.
Að lokum var borinn fram semifreddo að hætti Keizarans, og vitaskuld þótti það ákaflega gott! Vel lukkað kvöld sem endaði ekki alveg nógu vel fyrir dr. Leifsson, sem er dyggur stuðningsmaður Manchester U…
Höfundur: Eiríkur Þann 21. maí 2011
Það hefur verið frekar hljótt hér á Vínsíðunni að undanförnu og er þar ýmsu um að kenna. Ég hef verið önnum kafinn í vinnunni, verið á dálitlu flandri í tengslum við það og einnig verið upptekinn við að koma frá mér vísindagrein. Nú hefur heldur róast á þessu sviði og því hægt að halda áfram með vínrannsóknir! Mamma og pabbi hafa verið í heimsókn hjá okkur undanfarna viku og þau komu með Muga Rioja Reserva 2006, ákaflega gott Riojavín sem smellpassaði með nautasteikinni. Góður eikar- og leðurkeimur, smá vanilla og tóbak. Einkunn: 8,5 – Góð Kaup!
Einar Brekkan gaf mér flösku af Kyburg Cabernet Sauvignon 2008. Þetta vín er frá Stellenbosch-héraðinu í Suður-Afríku, lítill framleiðandi sem framleiðir einnig Merlot, Shiraz og svo blöndu af þessum þrúgum. Framleiðslan er aðeins nokkur þúsund kassar og mér hefur ekki tekist að finna neina umsögn um þessi vín hjá neinum af hinum þekktari víngagnrýnendum. Vínið er með góðan eikar- og tóbakskeim með smá súkkulaðitónum. Gott vín sem passaði vel með kálfa-entrecote. Einkunn: 8,5 – Góð Kaup.
Vínklúbburinn íslenski hélt árshátíð sína um síðustu helgi og að þessu sinni var þemað surf’n'turf. Veislan mun að vanda hafa tekist til vel og mig er farið að langa verulega mikið að komast í þessa veislu enda nokkuð mörg ár síðan ég tók síðast þátt. Litli vínklúbburinn í Uppsölum mun halda sína árshátíð um næstu helgi og þemað verður ítalskt, bæði hvað varðar mat og vín. Þetta verður góð upphitun fyrir úrslitaleikinn í Meistaradeildinni, verst að það er fyrirfram ákveðið hverjir eigi að vinna í ár (sorrý Smári og Dr. Leifsson).
